政情：假訊息撕裂社會 郭偉强促立法規管

工聯會喺上月二十二日至本月五日進行網上問卷調查，訪問逾千名市民。工聯會喺反修例事件同新冠肺炎疫情事件中，選取十項虛假訊息，其中有七項被認為係荒謬誤導，最多受訪者選擇「全民檢測會流鼻血和測試者的脫氧核糖核酸（DNA）樣本移送內地」嘅訊息，有八百二十八名受訪者認為屬荒謬，其次就係「十八歲女子聲稱在警署內因姦成孕」。

喺十項虛假訊息中，有八百零二名受訪者認為「爆眼女事件催化仇警情緒」嘅訊息係最煽動情緒；亦有八百零三名受訪者認為「八三一太子站稱有六人遭警方打死」係最分化社會。

指互聯網未受限 罰則欠阻嚇

議員郭偉强話本港過去一年因反修例事件導致社會撕裂，當中包含唔少假訊息，又指現時香港嘅法例形同虛設，僅規管任何人使用電報、電話、無線電話等傳送虛假訊息，但唔包括互聯網，而且罰則亦冇阻嚇性。

佢認為政府唔應該大落後，要參考外國經驗，以防止散播虛假訊息、立法規管大型社交媒體喺限時內刪除明顯違法嘅內容同埋設立上訴機制處理有爭議嘅內容。