政情：泛民Hea住示威 戴定頭盔

無計可施 提規程問題畫花選票

民主派嘅議員早前進行民調決定去留，但喺支持及反對數目都未能達到門檻下，佢哋以政治決定為由，話希望可以行「議會路線」，阻擋受爭議嘅政策通過喎。不過講就口響，好似上周五內務委員會同財務委員會選舉正、副主席時，都已經見到民主派無晒招數，只係故技重施，不斷提名候選人同提出規程問題，又或喺選票度寫上「SAVE 12」，嚟表達對於喺內地被拘留嘅十二港人之關注，但同外界認知嘅「議會路線」好大出入喎！唔怪之得當日唔少網民都嘲諷話啲招數「好有用」、「簡直驚天地，泣鬼神」。

仲記得林鄭舊年去立會宣讀施政報告時，民主派又舉示威標語，又用大聲公嗌口號，走出座位製造混亂，甚至用投影機喺議事廳嘅牆上投射標語，令宣讀程序被迫中止，最後林鄭需要改以電視直播形式發表施政報告。

網民爆粗嘲諷 「怕死咪做議員」

林鄭周三再到立會宣讀新一份施政報告，相信唔少人都想知話留喺議會對抗所謂惡法嘅泛民有乜抗爭動作？之但係，張超雄尋日就喺一個電視節目上被問到呢件事時，就話最基本、初步傾向係言語上或標語上嘅表達，但實際操作要再討論。佢亦承認喺《國安法》實施及現時有權用盡嘅情況下，有人會利用立法會嘅《權力及特權法》去控告議員，坦言要做示威行動係比較困難。唔通冇咗前議員朱凱廸同陳志全主攻，民主派議員就乜都做唔到？

張超雄呢番說話出咗街就引嚟一班網民不滿。有人喺網上留言話，「一早問你哋喺國安法下驚唔驚啦，驚就咁入去叫吓舉吓牌有鬼用」，又有人爆粗諷刺佢哋，話「一開始仲講×到接受『中央委任』留守抗惡法，原來又玩『今日係民主自由最黑暗嘅一日』」，更有人炮轟佢哋示威都怕死，不如連議員都唔好做啦！

畀網民鬧爆，唔知民主派議員點同佢哋嘅支持者交代？