中環出更：陳肇始施寒冰掌 三量體溫失敗
疫情未受控，社區仍有零星爆發，政府喺石籬社區會堂設立嘅葵青臨時檢測中心尋日開始運作，食物及衞生局局長陳肇始尋日下晝「出巡」，了解運作情況，但未入去就出現小插曲，喺門口嘅體溫探測機足足三次都冇反應！
事緣陳肇始用右手掌探咗三次都量唔到體溫，最後換左手再探先成功入到場。其後助手解釋，可能陳肇始嘅座駕冷氣太大，所以體溫低咗啲，先量唔到體溫。睇嚟陳局長「寒冰掌」功力未夠深，下次都係着多件衫保暖穩陣啲，冷親就唔好啦！
醫生：手探額探欠準確
家庭醫生關嘉美話體溫探測機係電子儀器，容易出現故障，最理想係量度核心溫度，即係耳探、口探及肛探等，如果量度表面溫度，即係手探、額探等，容易受外在環境影響，好似出汗，體溫準確度會欠佳。
關醫生又話由於檢測中心人來人往，好難應用水銀體溫計呢類儀器量度核心溫度，為穩陣起見，可以喺場地入口加設兩部體溫探測機，萬一其中一部故障，都有另一部去量體溫，減低「走漏眼」嘅風險。
卓妮