政情：問到昔日傳聞被追求 容海恩大方答「有」
議員容海恩（Eunice）同議員楊岳橋，上周日喺論壇節目嘈到面紅耳赤。日前Eunice出席網上訪談節目，期間有網民問佢，以前有冇遇過楊岳橋嘅追求？呢條問題已經夠爆啦，而Eunice仲要答「有」喎，搞到全場起哄之餘，仲引起網民一片嘩然！
隨即話係有影合照
話說議員柯創盛（柯仔）喺節目提起，Eunice同佢老公袁彌昌兩人政見不同會唔會嘈交？而Eunice就話政見唔係最重要嘅，兩人相處最緊要互相尊重，以和為貴。跟住有網民問，話之前見過Eunice同楊岳橋合照，就好奇問到底楊有冇追過佢啦，點知Eunice答「講解吓先……有」，呢個答案搞到柯仔都當場呆咗！不過Eunice隨即補充，只不過講緊有合照啫。
其實，兩人都唔係第一次傳出誤會喇。早喺三年前，Eunice同楊岳橋一齊體驗聾啞父母嘅日常生活，當時兩位議員各自抱住BB，仲影咗張四人合照。有市民當時就話張相影得好似一家人，之不過，估唔到過咗咁耐，都仲有網民抽水喎！