中環出更：斥起樓審批慢 謝偉銓促簡化程序
本港嘅房屋土地一直供不應求，但政府未有積極解決。建築、測量、都市規劃及園境界議員謝偉銓（Tony）就拍片話，香港寸金尺土，普通市民好難承擔高昂嘅樓價，但政府未能加快覓地起樓之餘，每次起樓嘅各項程序都要經歷漫長嘅審批時間，認為必須簡化程序、加快建設。
籲開發海洋公園周邊用地
Tony早前喺社交平台上載影片，認為政府需要擔當更主導嘅角色，積極覓地起樓，又話土地供應專責小組早前向政府提供多項建議，但政府就冇加快落實同善用土地資源。Tony批評政府每次填海都需要好多年先搞得掂，認為應同步開發海洋公園周邊、黃竹坑工廈等用地。佢又呼籲政府吸取設立臨時醫院、隔離檢疫設施嘅經驗，改進現行法規，以加快興建過渡性房屋，繼而紓緩劏房問題。
至於政府每次從計劃起樓到落成都要好幾年。Tony就話政府不同架構，喺不同階段嘅審批都需要好耐，未能有效解決房屋不足嘅問題，建議政府簡化程序，加快落成新住宅單位。不過，政府似乎就成日諗住虛無縹緲嘅「明日大嶼」計劃，都唔知研究幾耐先可以落成囉。
卓妮