中環出更：港人近視幼齡化 陳健明囡囡與螢幕為伴
視力弱化，唔一定喺老人家身上發生。去年有大學嘅調查顯示，港人嘅「四眼一族」有幼齡化嘅趨勢。卓妮早前出席一個關注大眾眼睛健康嘅活動時，見到國際獅子總會中國港澳三○三區第一分區主席陳健明（Patrick）都有戴眼鏡，原來佢當年喺加拿大讀大學時，某日開車駕駛時感覺視野模糊，後來進行眼科檢查先至發現自己患上近視加散光，由此開始眼鏡就同佢寸步不離。
Patrick話初戴眼鏡之時都唔習慣，加上佢又鍾意踢波，戴住眼鏡踢波都食過唔少波餅咁話。現代社會幾乎任何事都講求電子化，視力出現問題嘅年齡愈嚟愈細，好似Patrick嘅囡囡只得十幾歲，但已經患有遠視，雖然佢都好想囡囡對少個螢幕一陣，但依家學校又話要透過電腦遙距上課、又推電子書咁，真係對少陣都唔得。Patrick依家惟有每逢周末都要求囡囡同佢去郊外望吓綠色植物同寬闊嘅景象，畀眼睛放鬆吓。
何順文玩過山車一定捉實眼鏡
至於患有五百幾度近視嘅香港恒生大學校長何順文就話，佢係讀緊預科嘅時候開始戴眼鏡，仲話自己次次玩親過山車都會一隻手捉實副眼鏡，另一隻手就緊握扶手，好驚副眼鏡會飛出嚟咁話。不過成日咁捉實副眼鏡都好唔方便，加上何校長平時又鍾意打吓網球，佢依家就醒啦，買咗條運動眼鏡繩，依家打網球就唔使怕副眼鏡係咁走位啦。
同場嘅香港眼科醫院院長袁淑賢就話，香港六歲兒童嘅近視比率係全歐亞地區最高，佢自己小學時代因成日煲故事書、小說咁，搞到近視要戴眼鏡，不過好彩之後有乖乖護眼，近視先至長年都維持係二百幾度左右。佢話其實兩歲以下嘅幼兒唔應該接觸電子螢幕，因為螢幕嘅光會令佢哋嘅眼睛造成好大負擔，仲建議大家用螢幕二十分鐘就要小休二十秒同望二十呎嘅遠物，另外仲可以不時眨眼同埋做眼操護眼啊。
卓妮