政情：立法會新一批年曆 沿用「摺埋」設計
立法會大樓喺舊年七月一日遭示威者破壞，情況至今仍歷歷在目。而立法會秘書處最近推出嘅新一批年曆，封面印有十幾個深色人形剪影。唔知攞景定贈興呢？無論如何，年曆嘅封面設計難免會惹人聯想喎。
睇番個設計，年曆自從二○一五年就已經採用風琴式座枱設計，當時有人話年曆會「摺埋」唔多吉利。然而，大樓喺上年遭受衝擊，直到依家都未完成所有嘅修復工程，真係差啲就應驗咗喇。
秘書處：可展示更多資料
根據秘書處嘅講法，指風琴式設計可以提供更多空間展示會議日期等資料。望番舉行大會嘅日子，倘若唔計十月十四日發表嘅施政報告，同埋下年二月廿四日發表嘅財政預算案，新一立法年度只有廿五次立法會大會，而最後一次大會將會喺下年七月十四日舉行。
另外，立法會延任不少於一年，又會否導致秘書處「趕工」，臨時要重新設計年曆呢？秘書處就回覆話，年曆只印上立法會嘅年度，唔會註明邊一屆立法會。睇嚟都好似冇乜嘢影響，但點解唔註明就無從而得知喇。