中環出更：冀包攬委員會正副主席 建制派「搏到盡」一人報十個名
立法會延任會期開鑼，內務委員會及財務委員會尋日選出正、副主席後，其餘十八個事務委員會亦將於下星期選出正、副主席，建制派為防止民主派操控會議及癱瘓議會，早前決定包攬所有委員會正、副主席。近日建制派議員陸續報名加入委員會，絕大部分議員都加入十個或以上嘅委員會。
委員會正、副主席選情逐漸明朗化，皆因建制派議員都搏到盡加入各個委員會，截至尋日下午嘅委員會暫定名單，建制派內，航運交通界議員易志明及飲食界議員張宇人最瞓身，加入十四個委員會；其次就係麥美娟、葛珮帆、謝偉俊等加入十三個委員會。
內部人選已成功加入
本報早前整合建制派內部消息，得出委員會正、副主席初步人選名單，對照過最新嘅委員會暫定名單，有關嘅人選都已經加入相關委員會，例如保安事務委員會正、副主席人選分別是陳克勤同容海恩，而兩人都已經埋位準備落場喇。至於人丁單薄嘅民主派選情當然唔樂觀，但佢哋仍然落力加入各委員會，當中有十五人加入所有委員會，但資深議員梁耀忠就無咁落力，只係加入四個委員會。
卓妮