中環出更：推飛機乾洗服務 鄧伙勝：慳錢又環保
乾洗唔單止用於衣物除污，大如民航客機，亦都可以使用乾洗方式嚟清潔機身。某飛機工程公司因提供飛機乾洗服務，日前獲香港工業總會（工總）頒發一項有關環保嘅獎項。代表該公司領獎嘅集團環境經理鄧伙勝話，相較於濕洗，飛機乾洗可以減少用水高達九成，單係計水費都慳番唔少。之不過飛機乾洗並非新事物，何解推出多時，直至近年先至漸受航空公司嘅垂青？
鄧伙勝解釋，所謂飛機乾洗，其實係以化學劑將機身嘅污漬清除，然而面世初期，有航空公司發覺進行過乾洗嘅飛機，機身表面出現刮花嘅痕迹。不過呢個缺點，近年因納米技術嘅出現而得到解決，現時嘅乾洗劑不但無損機身，且會形成一層保護薄膜。機身表面清潔光滑，空氣阻力大減，飛行嘅油耗自然降低。鄧伙勝話除咗乾洗之外，公司另一環保項目就係研發氫氣驅動嘅飛機牽引車，但礙於香港缺乏氫燃料，惟有將項目交由美國分公司處理。
生產水泥，向來都係高耗能同高污染嘅代名詞，不過有一間水泥生產商，因懂得喺生產水泥熟料呢種半成品嘅同時，處理固體廢物而獲得工總嘅嘉許。該公司嘅投資者關係部總經理林虹話，由礦物原料煅燒為水泥熟料嘅過程中，燃煤嘅水泥窯亦將生活垃圾、有毒危險物同市政污泥一併高溫燃燒，剩低嘅殘渣可以同熟料混合成為混凝土，有效減低堆填區嘅壓力。
老少聰倡建綠色產業園
環保資源管理公司嘅業務經理梁一陽，因出色嘅回收工作而得到環保領先嘉許獎，佢話環保業入行門檻低，只要肯拾紙皮就算係從業員，不過能否做得專業就係一門學問啦！佢話香港生活成本高，就算廢紙回收都要走高價值路線，通常較為白淨嘅文件紙張因纖維較長，再造嘅成品價錢較好，反之粗糙嘅紙品如雞蛋包裝盒，纖維太短幾無再造嘅價值。工總總裁老少聰，認為環保係長遠事業，下一代應從小就灌輸廢物分類嘅知識，況且回收再造係香港再工業化嘅重要一環，政府應考慮撥出用地以建立綠色產業園咁話。
卓妮