政情：警員佐級協會 投訴郭家麒專業失德
香港警察隊員佐級協會主席林志偉去信香港醫務委員會主席劉允怡，投訴任職醫生嘅公民黨議員郭家麒專業失德，指郭一再喺網上惡意中傷同羞辱警務人員，煽動仇恨，其卑劣行為與醫者應有嘅崇高道德標準相違背，又話唔少市民亦認為郭嘅惡劣言行有辱其醫生身份，令醫學界蒙羞，實為杏林之恥。
林指作為一名醫生理應具備更崇高的專業操守標準，讓公眾對醫生專業嘅能力同誠信保持信心，醫生若犯下違紀行為，其姓名可從醫生名冊中被刪除，亦即其行醫資格可被褫奪。佢質疑病人點可以信任一個顛倒是非、皂白不分、終日為撕裂社會而埋首抹黑執法者嘅醫生呢？
林又提及舊年反修例事件期間，警方多次被人用雷射光惡意照射眼睛，郭作為醫生唔單止未有勸阻涉嫌以雷射光傷害他人嘅人士，反而三番四次以雷射光有其他功能等說詞嚟為佢哋辯護。林促請醫委會務必公平、公正同審慎處理有關投訴並作出合乎市民利益的裁決。
曾批警方「是一堆綠色物體」
郭家麒本月一日喺Facebook貼文，批評警察「是一堆綠色物體，甘作為殘暴政權的走狗」，又指警察可能學歷不高、水平不足，卻有高薪厚祿，能夠吸引到這堆人死心塌地作奴隸。對於香港警察隊員佐級協會向醫委會投訴，郭表示公道自在人心。