政情：潛逃前參選立會 張崑陽有54萬捐款落袋
立法會選舉押後一年，原本嘅參選人陸續提交選舉開支申報，流亡海外嘅前「民間外交網絡」發言人張崑陽一蚊都無申報，但就獲得私人公司捐贈巨款，唔知佢點處理呢？
張崑陽原本參選九龍西選區，獲得「Chung Chi Limited」提供高達五十四萬元嘅現金捐贈，但申報上顯示張並無實質支出，而民主動力亦捐贈咗三萬蚊。
張崑陽早喺八月十七日傳出已秘密潛逃去英國，佢被控參與今年六月四日喺維園舉行嘅未經批准集結，但喺九月十五日缺席聆訊，同日喺Facebook貼文證實已經離港，話《港區國安法》實施令佢覺得安全受威脅，但拒絕披露身處地。而張喺選舉開支申報最後嘅簽署日期係八月廿四日，選管會就喺九月廿九日收到開支申報。
黃之鋒被DQ 埋單僅700元
參選九龍東地區直選嘅黃之鋒早前被選舉主任取消參選資格，但喺選舉工程都用咗近五十萬四千港元，而大約五十萬三千港元嘅選舉捐贈中，其中「Chung Chi Limited」提供約四十四萬港元，其餘約五萬蚊就嚟自民主動力，黃之鋒只要畀大約七百蚊埋單就搞掂。