政情：包攬正副主席內會打到財會 泛民多招攔路 建制見布剪布

包括民主黨議員胡志偉同公民黨（公文袋）議員楊岳橋等泛民議員早前表明延任，雖則泛民議員減少，但建制派預料泛民未來一年會採取更激烈嘅路線，亦估計泛民勢必阻撓內會同財會選舉正、副主席。

倘有肢體衝突 會報警處理

現任內會副主席馬逢國話舊年因李慧琼爭取連任主席，而相關嘅議程由時任副主席、公文袋議員郭榮鏗主持，導致局面一度混亂，仲拖延選舉長達七個月。但依家形勢有變，因於正、副主席都由建制派議員擔任，相信選舉過程會比較順利。

至於建制派之間有冇商討對策？佢話當然有唔同嘅方案，但由於未知泛民要點玩，建制派都好被動，所以都係預咗打「防禦戰」、見招拆招；倘若泛民亂嚟、搞肢體衝突，估計建制派到時會報警處理。

陳健波籲泛民勿浪費時間

內會之後緊接嘅財會選舉正、副主席又點搞呢？現任財會主席陳健波（波哥）坦言，如果內會選舉卡死咗，財會選舉主席嘅議程都會「塞車」，希望泛民議員唔好浪費時間搞場「鬧劇」，更加唔好為咗配合激進選民而爆發衝突。波哥又提醒泛民議員，喺《港區國安法》下，議員嘅刑責同普通市民無異，並唔會受到特權保障。

之不過，波哥都有「兩手準備」嘅，話如果出現混亂情況導致開唔到會，都會喺下星期一用全日時間選舉財會嘅正、副主席，希望趕喺政府發表《施政報告》之前完成選舉。

或取消政綱環節 防止拉布

其實由郭榮鏗主持內會選舉議程期間，就係任由議員發言又不設時限，加上泛民議員嘅「助攻」、瘋狂提出規程問題，但類似「瘋狂拉布」嘅情況喺嚟緊嘅選舉並唔會出現。據聞，建制派喺各委員會選舉主席時，都會採取更加嚴格嘅態度，有意競逐嘅議員發言後就會進入提名階段，繼而投票，好有可能連競選政綱嘅環節都慳番添呀！