中環出更：近90%長者疫下現焦慮 明愛長者聯會促加強支援
本港新冠肺炎疫情持續多月，唔少長者減少外出避疫，大大減少日常社交活動。明愛長者聯會喺上個月訪問逾一千二百名六十歲以上長者會員，發現有八成九受訪者唔識得用手機同電腦，喺苦無傾訴對象下出現焦慮。該聯會認為政府喺下周三公布嘅施政報告中，應增撥資源鼓勵長者使用資訊科技，如提供現金資助等，並增設社區醫療服務隊，向體弱長者提供到戶支援服務。
不諳科技 難向親友傾訴
調查結果發現有八成九受訪者疫情下隱匿在家，社交活動大減，又不識得用智能電話，難以向親友傾訴而出現焦慮；九成一期望政府能為長者提供到戶診症服務，因唔少長者為避疫，改由照顧者代為到醫院覆診取藥，或影響康復進度。
獨居長者謝女士話以往經常到長者中心打發時間同結識朋友，惟早前疫情嚴重，只能留喺屋企睇電視避疫，加上不時有長者染疫離世，愈發感到不安，甚至曾致電身處美國嘅女兒交託身後事。幸其後疫情有所緩和，佢到中心學習上網同玩遊戲，心情變得輕鬆，期望當局可增加長者中心人手，讓更多長者可學習上網。
卓妮