中環出更：免沉溺電子奶嘴 曾少江撐子女玩玩具
依家好多小朋友都沉溺「電子奶嘴」，其實實體玩具更加有益身心，達到玩物「益」志嘅目的。回想起細個，香港青年創業家總商會政策倡議小組副召集人曾少江同細佬妹成日爭玩具，而家教比較嚴厲，要佢哋專注學業，唔畀有太多娛樂，即使辛辛苦苦儲起零用錢買玩具，都唔可以見光呀！
曾少江依家為人父母，唔單止好支持小朋友玩玩具，仲要開埋玩具舖添！佢話原本主要做餐飲生意，但疫情下發現玩具生意有發揮空間，皆因小朋友減少出門，喺屋企都要搵啲細藝，家長都會更捨得買玩具畀小朋友。不過，當然唔止小朋友有特權玩玩具喇，實質上係老少咸宜，負責內部管理嘅細佬曾少寶由細到大都好鍾意玩具，依家有能力就將興趣變成一門生意。
青年創新企業家協會主席馬福意（Stephen）話依家好多小朋友鍾意打機，會為自己兩個仔訂立時間表，以免佢哋太沉迷會傷害眼睛。Stephen認為實體玩具更多益處，平時更加會陪兩個仔「家庭樂」玩玩具，佢話例如樂高積木變化較多，可以激發無限嘅創意思維，畀小朋友發揮小宇宙，佢又講到小朋友嘅思想已經進入科技年代，當砌到樽頸位嘅時候，仲識得自己上網搵方法。
謝海發玩積木保持童心
玩具嘅好處多多，原來仲可以同做生意扯上關係。香港青年創業家總商會主席謝海發（Calvin）話做生意要打好根基，萬丈高樓平地起，就好似砌積木一樣，基礎穩紮穩打先可以愈起愈高。Calvin又講到雖然自己好鍾意樂高積木，但大個咗都怕令人覺得幼稚，有次偶然發現有幾個生意夥伴有同樣愛好，先至重拾興趣，保持童心，仲發現積木有收藏價值添！
卓妮