由屯門至馬鞍山嘅單車徑喺上月底貫通，但劣評如潮，有指新開放嘅元朗至上水路段斷開一截截容易失控，更有啲路段沿途有貨車經過，但又有唔少塑膠護柱，喺閃避時險象環生。話時話，發展局局長黃偉綸喺七月發表嘅網誌時，仲搵埋土木工程拓展署嘅官員嚟硬銷單車徑同分享設計概念同特色，原來特色就係有好多「地雷陣」，諗住保護車友變咗增加意外風險，簡直係靠害，唔該黃偉綸聽吓啲車友嘅意見，快啲去補鑊喇！
