政情：報名參選驚遇襲 周浩鼎聘10保安

睇番Holden嘅選舉開支，佢喺七月廿二日僱用十名保安，每位酬金五百，合共係五千蚊，呢筆錢就由同埋參選區議會（第二）嘅議員李慧琼攤分，Holden申報四千蚊，李就申報一千蚊。Holden回應本報查詢時指，僱用保安係其競選辦嘅安排，目的係想喺公開場合做好防禦措施，以防可能發生嘅人身傷害。佢仲話自從街頭出現黑暴，公眾人物遇襲嘅風險不容忽視，但唔會因懼怕暴力而放棄工作，有必要提高保安同警覺性，唔排除日後繼續僱用保安。

選舉開支過百萬 所屬政黨埋單

作為現任議員嚟講，Holden都使咗唔少錢，用咗約一百零九萬幾，有賴所屬政黨幫佢埋單，所以一蚊都唔使自己出。另外，Holden花錢最多就係選舉廣告，大約使咗六十一萬，當中包括有廿幾萬係巴士車身、小欖轉車站廣告板、大欖隧道嘅廣告費同埋製作費。

有部分現任議員嘅開支亦出爐，同樣參選新界西嘅工聯會麥美娟就使咗約六十一萬，其中喺選舉廣告方面亦使咗差唔多四十二萬，佔整體開支都有六成幾，所有費用亦獲得所屬政黨嘅政務發展基金捐贈。實政圓桌田北辰就使咗約四十六萬，選舉捐贈就約有三萬五千蚊，由實政圓桌捐贈。值得留意嘅係田北辰喺其創立嘅服裝品牌花費六萬幾，除咗買義工背心，仲有請司機同埋借用辦公室等，另外佢亦使咗三萬幾，搵公司做個人支持度嘅民調。

12名民主派被DQ 使費不獲發還

至於泛民方面，爭取連任嘅民主黨鄺俊宇就使咗約莫八十四萬，民主黨同埋民主動力加埋捐咗約四十八萬；參選新界東、唔接受延任嘅人民力量陳志全就使咗近廿萬，選舉捐贈就有九萬幾，當中有五萬幾係募捐，民主動力亦捐咗二萬八千幾蚊。喺今次立法會選舉中，有十二位民主派被取消參選資格，換言之政府亦唔會向佢哋發還選舉開支。其中現任議員楊岳橋就使咗約三十四萬，民主動力同埋所屬嘅公民黨合共捐咗近十三萬。參選港島區嘅南區區議員袁嘉蔚就使咗約六十萬，除咗民主動力，仲有名為「Chung Chi Limited」嘅公司都有份捐款，所有捐贈合共約五十九萬。參選新界東嘅何桂藍同樣獲「Chung Chi Limited」捐款，佢合共使咗約六十四萬五千，呢間公司同民主動力合共捐咗六十四萬三千幾蚊，再扣減埋其他捐款，何只係倒貼幾百蚊，而袁就倒貼萬幾蚊。