中環出更：立會大樓部分入口修復 「煲底」仍關閉
去年反修例風波期間，大批示威者喺七月一日衝擊立法會大樓，不但導致大樓滿目瘡痍，議員入口二附近嘅落地玻璃，更因示威者嘅刻意毀壞而打至粉碎。一度關閉以進行維修工程嘅議員入口二尋日終於重開，周邊嘅玻璃更換完畢，雖然拆咗圍板，但表面仍然有膠紙覆蓋。
大樓嘅議員入口二附近玻璃，係去年被示威者用鐵籠車、鐵欄等硬物衝擊而受到嚴重破壞，示威者繼而衝入大樓裏面大肆破壞，包括將多位前立法會主席嘅畫像噴污。部分激進示威者更撬開會議廳大門，衝上主席台塗污會議廳內嘅區徽添。事隔一年幾，立法會議員入口二周邊，終於換上新嘅落地玻璃，秘書處亦發出通知，話入口於尋日下午兩點重開。
加強保安 增設1.8米高閘機
其實立法會大樓自去年六月以來，都使咗唔少錢喺維修費用喎。睇番資料，原來淨係大樓修復工程用嘅建築面料費用，都高達逾二千萬港元，加埋其他系統同設施，總數高達約三千九百萬港元添！
據本報記者到場視察，議員入口一、公眾入口一都已經拆去圍板。「煲底」附近嘅圍板都移除咗，但仲有唔少水馬。另外，行政管理委員會早前開會，話為咗加強保安措施，將會喺今屆會期內，喺大樓內增設大約十部設有玻璃板達一點八米高嘅閘機，而大樓嘅外圍仲會增設防撞欄，但暫時仲未見展開任何工程喇。
另外，議員資料版都有更新。三位唔接受延任嘅前議員陳志全、朱凱廸同埋陳淑莊嘅資料都仲有保留，但就寫明任期至九月三十日。而入咗「熱廚房」嘅勞工及福利局副局長何啟明都有保留資料。但幾位被DQ嘅前議員同埋早前被裁定「非妥為當選」嘅范國威、區諾軒及陳凱欣，就冇被保留喇。
卓妮