中環出更：何啟明入勞福局 陳婉嫻話無咩用
縱橫政圈多年嘅工聯會榮譽會長陳婉嫻（嫻姐）同過好多政府官員交手，佢認為工聯會出身嘅勞工及福利局副局長何啟明入咗政府後發揮到嘅作用始終有限，最多只係「高級政治助理」喎。咁又難怪嫻姐咁講嘅，事關何啟明做咗副局長之後，就唔再堅持爭取失業援助金，仲話諒解政府咁話，被質疑已經忘記咗初心。
嫻姐近日接受黨友鄧家彪網台節目訪問，大讚港人好有骨氣，個個寧願自食其力打工賺錢，都唔想攞綜援，然後借勢批評勞福局局長羅致光唔識對症下藥，只係叫失業嘅市民去申請綜援，但其實有好多人不合乎資格，政府好應該推出臨時性質嘅失業援助金，放寬至個人名義申請，就已經可以解決問題。
警告稱三界別或聯手反對施政
嫻姐仲話，有從事飲食業嘅打工仔投訴，老闆要求佢哋預先透支今年同出年嘅假期，就此佢要求立法會議員質詢政府，到底咁做係咪屬於勞工處規管範圍，避免員工任人魚肉。嫻姐警告，政府推出三輪防疫抗疫基金無考慮基層問題，必須全面檢討抗疫政策，否則勞工界、工商界同專業人士會聯手反對政府施政，咁就好麻煩喇。
卓妮