政情：藉猜燈謎 謝偉銓嘲政府欠創新
早兩日係中秋佳節，相信大家都有猜吓燈謎。建築、測量、都市規劃及園境界（建測規園界）議員謝偉銓（Tony） 更拍片同市民一齊估，其中有條題目係「花滿海灣」，估一個地方，而選項有小西灣、中環、香港及大灣。而答案就係香港喇，點解呢？
指港需「估你唔到」精神
Tony話因為花係香嘅，仲話結果真係「估你唔到」，但佢話香港正需要「估你唔到」嘅精神，仲藉住猜燈謎鬧爆政府創新科技做得不足添。
Tony話政府應該以創新意念同科技應對「疫境新常態」，認為要加快智慧城市、智慧政府嘅建構步伐，同時推動電子支付、普及電動車等等。
佢又話政府應該有新思維突破固有框架，真正發揮「估你唔到」精神咁話喎。但其實政府咁多年以嚟，創新科技方面都冇咩進展。Tony兜咁大個圈，唔知政府又係咪聽得明呢？