中環出更：解決房屋短缺 黃偉綸紙上談兵

香港土地房屋短缺問題一直都難以解決。有市民問公屋項目發展成點，而黃就指古洞北、粉嶺北、洪水橋、元朗南等發展區可以提供超過十三萬個公屋單位，足以滿足香港幾年嘅需要。棕地方面，黃就搬出一堆數字，話有七百幾公頃土地研究緊，另外有部分會交由規劃署研究。其實講到尾，前述四個項目都係「紙上談兵」，若非正待展開前期工程、就係話研究中。而局長嘅總結係，相信不久嘅將來就有結果。由於並冇交代「將來」嘅確實日期，睇嚟市民要畀啲耐性，繼續等喇！

至於單車徑方面，黃偉綸話「單車加旅遊」絕對有空間做。但又「戴定頭盔」，話連接荃灣同屯門嘅單車徑，工程挑戰比較大，但局方有信心克服。

明日大嶼財務安排 含糊其詞

黃偉綸仲提及備受爭議嘅「明日大嶼」計劃，話財務安排有好多可能，局方會研究同埋考慮全部可能性。至於財務安排嘅結果係點？黃竟然回答「接下來用乜嘢方法做最好，研究完咪知道囉！」局長答得咁模糊，到底開出嘅支票能否兌現，似乎連黃偉綸自己都冇咩信心咁喎！

卓妮