中環出更：憂雙疫夾擊 唐卓敏促港府加強治鼠
香港長久以來，鼠患都係揮之不去嘅問題，前年更爆出全球首宗由老鼠傳染畀人類嘅戊型肝炎個案。核子醫學專家唐卓敏（William）話，政府嘅滅鼠工作做得差，今日喺街市等地方不時發現鼠蹤，佢又話試過有朋友行行吓街，突然遭老鼠咬腳趾，認為政府要加緊防治鼠患，以免疫情肆虐下，衞生情況雪上加霜。
William提到，佢有位朋友某次着涼鞋落街，突然有隻老鼠從坑渠竄出，直撲埋腳趾咬咗一啖然後就逃之夭夭，雖然友人傷勢並冇大礙，不過身體無端見紅，好唔吉利囉！佢話老鼠繁殖力強，治理工作只要稍有鬆懈，情況可以好快惡化。然而政府嘅滅鼠力度不足，以致喺街市不時可見群鼠出沒。講到即將面世嘅新冠肺炎疫苗，William就慨嘆話，病毒變種速度快，有可能疫苗今日接種，病毒聽日就變種，因此疫苗好可能要不斷更新。
黃麗群：幼園教洗手歌配動作
由於William日常喺診所接觸唔少病人，所以佢一返到屋企，其妻子、香港曼克頓扶輪社候任社長林青（Erica）第一時間就要佢全身消毒，之後先可以入屋，跟住就入浴室沖涼，而啲衫褲要分開洗，安全至上咁話。香港曼克頓扶輪社現屆社長徐道飛（Fiona）就講到，疫情雖屬非常時期，但佢同一眾社員依然會持續服務，好似探訪老人院、送物資等，但就一定會做足防護措施，以免中招咁話。
從事幼兒教育嘅黃麗群（Miranda）就話，現階段幼稚園嘅衞生措施都做得相當嚴謹，首先要幼稚園三年班學生才可回校，而且要分流，排隊亦要有一定間隔，小朋友要戴口罩及眼鏡，學校消毒都要做足。Miranda仲話，學校最近都多咗唱洗手歌，唱歌時配上動作，培養小朋友勤洗手、講衞生嘅習慣，雖然需額外嘅人力物力但都係必須，若果小朋友有事真係非同小可嘞！
卓妮