政情：陳日君食檸檬 赴羅馬不獲教宗接見
天主教香港教區主教楊鳴章自去年一月病逝，主教一位出缺近兩年，接任人誰屬一直未有定案。就呢個問題，天主教香港教區退休主教陳日君上周就特意到訪羅馬，諗住同教宗方濟各會面，點知就食檸檬。除此之外，佢喺呢趟行程更同駐當地記者會面，大談對於主教人選嘅想法。
圖商港區主教人選
事緣八十八歲嘅陳日君到咗羅馬之後同一名駐梵蒂岡資深記者見面，對方喺網上報道咗佢哋嘅對話。陳日君話過去有個主意，就係由教區輔理主教夏志誠接任主教一位，豈料之後被告知佢哋「需要一個被北京祝福嘅人」、即神父蔡惠民做繼任人，唔少人對呢個決定都大感不滿。佢又形容成件事好荒謬，批評「只係因北京願意，佢就成為首選」。
陳日君仲透露，今次寫咗封信希望交畀教宗，信中提到若然真係由蔡惠民做主教，對香港教會嚟講將會係一場災難。佢提到已經告知教宗會喺羅馬逗留三至四日，希望對方可以電話聯絡自己，可惜一直等待都未有回音，最後只好將信件交畀教宗私人秘書。