中環出更：中秋勿忘敬老 陳炳光：疫下團圓係福氣
中秋節係一家大細聚埋賞月、食月餅嘅日子，蘭桂坊扶輪社候任社長陳炳光（Sherman）最鍾意同屋企人一齊食湯圓，Sherman仲呼籲家有長者嘅市民趁中秋返屋企同老人家食碗寓意齊整團圓嘅湯圓，喺依家嚟講係一種福氣咁話。
點解Sherman會咁講？事關佢平時做義工服務，都發現好多長者喺疫下會出現既焦慮又低落嘅情緒，覺得大家都要多啲關心老人家。講開細個玩燈籠，佢話試過掛隻點咗蠟燭嘅紙燈籠喺屋企陽台，可能當時大風吹到啲蠟燭令到燈籠着火，最後仲燒埋落陽台，差啲搞到個陽台大火燭添，好彩嗰時佢夠冷靜，即刻用張棉被撲熄咗啲火咋！佢仲話自此之後，對玩紙燈籠都特別小心。
甄韋喬太太新抱入廚露兩手
同場嘅願景基金會主席甄韋喬話既然依家冇得出街玩，太太同新抱就打算入廚露番兩手，煮菱角、芋頭之類嘅應節食品，當係增添節日氣氛。甄韋喬仲話，屋企人仲會煮碌鵝呢道佢嘅家鄉餸添，話諗起都流口水呀！
講起中秋節，甄韋喬記得舊時細個會帶埋碌柚、月餅等食品，同家人去公園野餐，有時食完隻碌柚仲會用嚟整「碌柚燈籠」添，認真過癮。不過，講到佢覺得最好玩嘅，莫過於就係「煲蠟」喇，之但係佢話依家諗番覺得好危險，叫大家唔好亂玩火。其實唔一定要玩火先有氣氛嘅，佢話今年佢個孫就有太嫲買嘅豬籠月餅食，一樣好傳統好應節咁話。
囝囝喺美國留學嘅菁英會副秘書長高松傑就話，今年中秋打算同媽媽出街食飯，當係刺激本地消費，佢亦都會同身處外地嘅囝囝視頻，提醒下囝囝唔好忘記呢啲華人社會嘅傳統節日咁話。喺佢身邊嘅網紅公司行政總裁曾榮輝就話，以前好鍾意食雙黃白蓮蓉，但因為真係太油膩啦，所以近三年都轉咗食素食月餅，覺得健康啲。
卓妮