中環出更：港府防疫應做唔做 黃定光財會爆粗
香港經濟遭到疫情嚴重衝擊，失業率高企，政府早前推出第三輪防疫抗疫基金，卻大縮水得番二百四十億元，當中僅有一百六十一億元係新增撥款，尋日再喺立法會財委會特別會議上審議。議員黃定光（象哥）喺會上批評政府措施過簡，叫政府做多啲嘢，但政府又話要再增人手，佢嬲到忍唔住爆粗大鬧「×街」添啊！
象哥指政府近年想做好事，但做出嚟就好似壞事咁，指面臨經濟困難嘅企業先至需要援助，反問冇困難嘅企業「好人好姐撐咩呢？」又指日日有工開嘅市民都唔使政府幫佢哋「保就業」，批評政府點解唔因應企業嘅情況分發資助，搞到啲資助落唔到去真正有需要嘅人手上。象哥又指政府藉詞審核唔同公司而增加人手，怒斥政府平時係咪唔做嘢，仲話「如果我自己嘅公司都好似政府咁就『×街』啦！」
講完即耍冧 更正做「不該」
代主席陳振英提醒象哥最好用番議會用語，象哥就回覆話唔好意思，更正番做「不該」。象哥又指唔會阻擋抗疫基金，不過就對有關措施深表不滿囉，希望政府可以正視社會困難。
政務司司長張建宗就話多謝象哥語重心長嘅提醒，話政府其實知道市民辛苦，但係財政赤字嚴重，公共資源上有困難，希望市民體諒吓喎。
卓妮