政情：公民講場：藥量易錯危害老友記 醫管局唔識善用科技

長者健康管理係人口老化嘅香港社會，一項無法忽視嘅課題。有調查顯示，需多重用藥而又活喺貧窮線下嘅長者，唔少都遇上整理藥物困難，以致食錯劑量又或者忘記食藥，有社區組織建議醫管局採用樂齡科技，為長者按劑量及服用時間預先分裝藥物，保障安全。而安老事務委員會主席林正財早前都講過，指醫管局涉及同病者有直接關連嘅事物係「零科技」，話疫情之下往往有幾百位老人家，喺醫院藥房逼埋一齊輪候派藥，咁嘅場面並唔理想。醫管局主席范鴻齡真係要諗下點樣利用科技以解決長者喺藥物上嘅問題，其實長者可以按時按分量食藥以穩定病情，公立醫院都無咁大壓力呀。