政情：泛民延任民調明公布 陳志全點都走人
部分民主派議員決定以民調決定未來一年係咪續任，負責進行民調嘅香港民意研究所，負責人表示已完成超過二千四百個樣本，待整理同分析數據後，預計今日完成報告；而委託進行民調嘅民主黨聽日將公布民調結果。而早前已表明唔接受延任安排嘅議員陳志全（慢必），尋日出席一個電視論壇節目時重申，不論民調結果最終為何，亦唔會影響佢嘅選擇。
稱泛民事前冇共識
慢必強調佢嘅議員任期只得四年，未來一年嘅延任任期欠缺民意授權，又相信佢大部分支持者亦唔會支持佢延任，故決定不延任。佢又重提自己曾經表示，若果全部泛民議員決定跟從具約束力嘅民調決定去留，佢會跟從有關安排，但就話泛民喺民調進行前並冇相關共識，故重申不論民調結果最終為何，亦不會影響其選擇。不過，佢亦提到，若果最終有十幾名議員唔延任，民主派應該商討未來一段時間嘅策略。
佢又強調自己並非決定永久杯葛立法會，只係未來一年拒絕延任，而自己會參加第七屆立法會選舉。佢又用天平嚟做比喻，認為依家情況有如選擇係咪放棄原則，去換取小量資源同影響力，認為泛民要做好判斷。