中環出更：科技埋沒藝術 邱達根嘆後生仔唔識書法
藝術既無分疆界，亦唔會囿於某一形式，不同嘅藝術種類亦有其捧場客。荔園主席邱達根（Duncan）就話自己對畫作特別有興趣，唔單止會喺閒時欣賞，仲會妥為收藏以作投資之用。
講起收藏，Duncan指不同嘅世代就會有唔同嘅口味，譬如郵票收藏就係老一輩嘅興趣。但自從電子通訊興起，效率較低嘅信件投遞漸遭邊緣化，連帶集郵嘅興趣亦難以進入年輕人嘅視線範圍。Duncan又認為書法，尤其是源遠流長嘅中國書法，係另一樣受到科技而影響嘅藝術，佢話依家科技發達，文字記錄同訊息傳遞毋須再依靠紙同筆，年輕人「字都唔寫多隻」，又點會懂得欣賞書法啊。
帶孩子參觀 羅耀荃靠手機定位
同樣鍾意欣賞藝術嘅，仲有香港環保回收業總商會主席羅耀荃，佢話經常往世界各地視察環保行業發展，去到外國必定把握機會，一把公事處理妥當，就會抽時間去參觀當地嘅博物館，話可以透過館內嘅展品去了解一個地方嘅歷史。羅耀荃話外國嘅博物館規模好大，憶起過往要拖實小朋友行以免佢哋走失，但依家有賴手機嘅定位功能，有時投入觀賞館藏都唔驚搵唔番屋企人。
著名時裝設計師馬偉明（Walter）特別鍾意觀賞外國嘅時裝表演，並藉此觀察唔同地方嘅服裝業發展，覺得香港喺呢方面望塵莫及咁話。時代急速變遷，Walter話都要保持思想開放，了解年輕人嘅諗法，確保自己緊貼大趨勢。香港珠寶製造業廠商會榮譽主席沈運龍（Aaron）就鍾意收藏鑽石，佢話廿年前想搵噱頭，於是嘗試創造世界紀錄，誰知遇到認證機構嘅冷待，從而激起決心不斷自我挑戰，不惜工本製作鑽石結他、馬桶等，目前已經擁有十項健力士世界紀錄。
卓妮