政情：區會擬用政治圖案作燈飾 民政處指令人不安
喺十八個區議會當中，十七個由民主派當道，經常被質疑以政治凌駕民生議題。油尖旺區議會早前通過以政治敏感嘅圖案作為節日燈飾，就被民政事務處反對喇！
油尖旺區議會節日慶典活動統籌委員會早前就節日燈飾申請一百零九萬元撥款，並通過將網上討論區嘅「連豬」圖案加入設計。之不過，民政處以《運用區議會撥款守則》同《油尖旺區議會撥款指引》，引述多個原因反對決定，包括指有關圖案令人不安、唔符合節日氣氛、影響社區和諧、為商業機構作宣傳，亦可能引伸版權問題，話若然區議會堅持執行決定，民政處將拒絕進行招標。
已跪低 同意改設計
雖然區議會已經「跪低」，同意會修改設計。但提出有關設計建議嘅區議員仍然「死剩把口」，指摘處方嘅行為屬政治審查，覺得有關圖案令人聯想起反修例運動，就用盡所有理由，將一個卡通圖案拒之門外，話政府並冇權力裁定圖案係咪會令人不安，將會送交淫審處由處方裁定。有關區議員仲講到為咗令區內仍然有燈飾存在，先迫於無奈讓步，講到好為居民設想咁話喎。