政情：公民講場：天橋墟市搞唔成 官僚累事 阻人搵食

為咗疫境求生，好多巿民都願意自食其力。尋日深水埗區議會，就鬧爆政府嘅官僚主義窒礙墟巿嘅籌辦。原來早前有民間團體，打算喺已告荒廢嘅昌新里天橋辦墟市，誰知申請過程困難重重，運輸署指並非管轄該天橋，路政署及民政署就話需要部門管理支持，結果相關政府部門互相卸責，導致區議會無法通過撥款。依家政府成日都話財赤嚴重，既然基層巿民可以透過墟巿賺番些少生活費，相關嘅政府部門點解唔幫吓手呢？坐喺冷氣房嘅高官如民政事務總署署長謝小華同路政署署長陳派明之流，唔知有冇聽過「阻人搵食，罪大惡極」呢句說話？