政情：選舉煞停 陳恒鑌仍花近百萬
立法會換屆選舉原定本月六號舉行，不過政府早前就以疫情嚴峻為由，宣布押後一年，最近各個參選人嘅選舉開支陸續出爐。參選新界西地方選區嘅陳恒鑌及其團隊開支接近一百萬元，花費最多嘅部分就係選舉廣告，盛惠六十六萬六千七百九十六元，用嚟印刷海報、傳單、標語牌同橫額，仲有訂造制服同小巴車身廣告，第二就係雜項開支，其中使咗廿萬喺宣傳品設計、製作、網絡宣傳服務套餐身上，另外用咗一萬二千六百四十八元五角聘請代理人同選舉助理，但係陳恒鑌團隊一蚊都唔使畀，事關有所屬政黨幫手埋單。
所屬政黨幫手埋單
出得嚟參選，個人形象都好緊要，所以參選人都好願意付出，打算出戰新界東嘅網媒創辦人馮達浚，豪花廿八萬多元喺個人開支部分，佢亦願意畀九萬四千六百元，搵顧問指導形象設計，仲有兩萬五千元嘅個人照片拍攝費，而選舉工程顧問費就用咗十六萬七千六百七十元，總開支都要成六十三萬二千九百四十二元。
功能界別方面，參選法律界嘅麥慶歡都唔輸蝕，用十三萬二千五百元嚟整理個人形象，另外仲有三萬元嘅選舉工程顧問服務費，埋單都要十六萬四千八百廿九元，但冇任何選舉捐贈。尋求連任嘅會計界議員梁繼昌，總開支九萬五千八百九十四元，包括四萬元個人形象費，扣番三萬一千二百五十五元嘅選舉捐贈，佢只係需要畀大約六萬四千六百元。