去年反修例事件中，有大批示威者喺七月一日衝擊立法會大樓，並進行大肆破壞。立法會行政管理委員會隨後委聘顧問，就立法會大樓嘅保安進行檢討，並於今年七月同九月嘅會議上接納建議，喺大樓外圍裝設圍欄、花槽及防撞柱，第一階段工程將於十一月展開。
根據立法會文件，工程將分兩階段進行，首階段工程係於立法會大樓外嘅範圍進行，包括沿添美道及立法會道一帶、以及廣場周邊，即示威區外嘅範圍增設花槽圍欄，圍欄高度比一個正常人仲要高。相關工程將於十一月展開，預計在二○二○至二○二一年度立法會會期之內完成。
至於第二階段工程，則於近添馬公園一帶嘅立法會廣場周邊進行，屆時將安裝不設花槽嘅圍欄，工程展開日期未定，但預計在二○二一至二○二二年度立法會會期內完成。