政情：風災致農戶損失慘重 侯志強斥索償手續繁複
颱風「海高斯」上個月吹襲本港，天文台繼前年超強颱風山竹之後，再度發出九號風球。上水鄉事委員會主席侯志強，就指上水部分鄉郊務農嘅地區受到颱風影響，損失慘重。佢話受影響嘅農戶可以向漁農自然護理署索償，但手續繁複、而漁護署都冇主動視察受影響嘅災區。
侯志強大呻話每次打風，佢都損失慘重，上次「海高斯」不但掃毀佢嘅農作物，魚塘仲因為風災而破損，搞到好多魚都走甩咗添。侯志強又話，因為地形限制，好難做到抵禦天災嘅措施，每次落大雨只要上游水位上升，位處低窪嘅種植區都會受到波及，惟有每次都做災後重建喇。
促漁署主動視察重災區
至於上水地區嘅農戶，侯志強話或多或少都受到風災嘅影響，然而農戶向漁護署申報嘅手續繁複，好耐都拎唔到錢。加上漁護署次次都等農戶申報損失，先至到現場視察，佢認為政府應該主動視察重災區囉。佢認為署方要積極啲，主動視察同埋加快申請索償嘅程序。不過佢栽種嘅農作物通常都係送畀朋友，所以就「費事煩」、唔申請喇。