中環出更：牛下女車神 李慧詩：每次問鼎金牌都係艱辛旅程
相比起其他職業，運動員生涯一般都比較短暫，能夠企喺頒獎台上攞獎，對運動員嚟講係一個肯定，其中獲獎無數、有「牛下女車神」之稱嘅李慧詩（Sarah）日前透過網上視像系統分享踩單車嘅點滴，Sarah話最辛苦係莫過於點樣搵到衝破難關同突破限制嘅方法，須同教練坦誠講出自己諗法，按部就班完成每節訓練。好多運動員都渴望攞獎，不過Sarah認為獎牌唔係必要亦唔係最特別，有冇進步自己會感受到。
Sarah話佢會為自己訂下時間表，早年先以亞洲賽為目標，結果用咗四年時間喺亞洲運動會上取得金牌，其後再喺二○一二年倫敦奧運會女子凱琳賽中奪得銅牌。曾經喺二○一三年世界場地單車錦標賽勇奪冠軍嘅Sarah認為，唔需要用獎牌證明進步，因為數據代表一切，透過參加唔同比賽，累積實戰經驗，自己都會有所得着。咁成名後心態有冇轉變呢？Sarah話當佢喺大型國際賽事取得獎項後會繼續做好本分，每一次問鼎金牌都係艱辛嘅旅程，唔會因為得獎而變得鬆懈，否則就會錯過下次奪標嘅機會。
同場嘅仲有香港中文大學內科及藥物治療學系醫學講座教授沈祖堯同中大生命科學學院教授陳浩然，沈祖堯話依家學緊水墨畫，老師話佢啲筆畫太快，學識慢慢畫同適當時候停筆好重要，佢建議李慧詩喺衝線嘅同時，亦都要學習停一停，諗一諗。
陳浩然曾帶傷參加馬拉松
陳浩然就話如果冇嘗試過，就唔會知道自己嘅極限，佢喺二○一二年曾經用九個月時間備戰渣打馬拉松但喺比賽前一個月受傷，為咗可以如期參賽，試過用針灸、推拿等方法治療，雖然醫生勸喻佢唔好去比賽，但佢唔想白費心機，最後仍然決定參賽，陳浩然就覺得好值得堅持，之後要慢慢克服傷患，用咗半年時間先至痊愈。
卓妮