政情：泛民攔路多招數 財會加鐘抗拉布

建制為防突襲 坐足全日等投票

政府推出嘅第三輪防疫基金及措施涉款二百四十億元，但部分款項需向財會申請，包括向防疫抗疫基金注資五十四億元；申請追加撥款約一百一十七億元用嚟採購疫苗同相關開支；進一步支援醫院管理局應對冬季服務高峰期或下一波疫情嘅撥款等。財會議程定喺當日上午九時至下午一時，同埋下午二時三十分至七時，分兩節開會，總共八個半鐘。

民主黨同公民黨早前表明會喺財會對基金撥款申請投反對票，其中民主黨主席胡志偉話對今次基金援助嘅金額感到失望，又質疑政府想將更多儲備放喺明日大嶼計劃上，大鬧政府無視反對意見。據悉，民主派議員今日會開會商討對策，但建制派「副班長」陳克勤就話佢哋周五會坐喺會議室等投票。唔知係咪驚民主派「突襲」，建制派仲不設輪更制，諗住坐足全日添！

波哥話其實四項議程都冇乜特別嘢可以拗，議員如果特登「積極發言」，亦都會好容易重複，而佢屆時會中止議員嘅重複提問。只不過，佢話有信心可以搞掂，但又戴番個頭盔話好難避免泛民出蠱惑，如果真係搞唔掂，最後可能都係要加鐘審議。

另外，波哥話當日前後加埋要討論八個半鐘，財會副主席陳振英都會幫手主持會議，如果加鐘審議，都要陳振英「捱義氣」頂多陣。至於倘若真係傾唔掂數，會唔會擇日再議呢？波哥就話，其實好難再夾時間，加上今次撥款好重要，但都只可以盡力而為。

倘拖到下年度 又要等再選主席

尤其就快展開新立法年度，到時財會要重新選出主席，睇嚟唔單止議程好重要，仲要趕喺換主席前搞掂撥款先得喎。

問到當日可否通過撥款申請，陳振英話要睇吓討論氣氛喎，但認為今次議案牽涉範疇比較多，估計唔少議員都有疑問同意見，希望泛民議員唔好用各種手段拖延，反而應該畀有需要嘅議員發言喇！