中環出更：彭定康又回魂 籲為港青設「着草基金」
末代港督彭定康（肥彭）又回魂，對香港事務指指點點，竟然公開呼籲外國大學提供助學金幫助香港年輕人逃離。「廿三萬監察」發言人王國興直指，所謂嘅助學金就等於係「着草基金」，怒斥肥彭粗暴干涉內政，引誘年輕人踏上不歸路。
肥彭出席國際研討會時，講到香港核心價值被中國政府打壓，包括言論自由、人權同教育，同時摧毀港人原本享有嘅高度自治同一國兩制。佢更呼籲國際間要透過多邊合作，密切跟進香港情況，提議透過大學為香港年輕人提供助學金，令佢哋獲得「救生索」逃離香港。
製造漢奸 誘年輕人踏不歸路
王國興怒斥肥彭已經離開香港二十幾年，形容肥彭為百足之蟲，仍然粗暴干涉香港內政。王指若果國際集資為香港學生提供資金，係公然支持參與反政府暴亂嘅年輕人，以助學金製造更多年輕新世代漢奸，助學金根本就係「着草基金」，引誘年輕人踏上不歸路，斷送光明前途。
王又話，事實上係英、美等國家破壞香港擁有嘅安寧，不斷抹黑香港，甚至出面支持香港暴徒，已經對呢類手法見怪不怪。
卓妮