中環出更：滙控股價大插水 張華峰：續長揸盼復派息
疫情重創香港經濟，就連滙控呢隻重磅藍籌股，表現都大不如前。曾幾何時唔少香港人都對滙控有情意結，覺得佢穩紮穩打，好多打工仔將大部分薪金買入滙控作長線投資。但滙控最近陷入「兩面不是人」嘅困局，股價已經觸及二十五年嚟嘅最低點，尋日股價更一度跌穿二○○九年「世紀供股價」二十八蚊，一班股民睇嚟都好頭痕喇。
金融服務界議員張華峰（肥老闆）當年就見滙控嘅形象良好，從而持有其股票。肥老闆回想大約係喺一九七○年，佢啱啱識得買股票就選擇買入滙控，而當年嘅買入價都唔平o架，作為一個普通打工仔都要儲一輪錢，先有能力買入一、兩手。但睇番依家，肥老闆話政治因素為滙控造成壓力，令股價跌到谷底，但畢竟係大型國際銀行，無損佢個人嘅長期投資部署，仍然都會長揸股份，但當然希望滙控可以恢復派息喇。
金融界議員陳振英（Ronick）就話基於議員身份，作為業界代表唔方便買賣股票，擔心出現利益衝突，所以手上並無持有滙控股份，亦話幾乎無朋友持有相關股票，因為唔少人早前已經睇準時機「止蝕離場」。Ronick話個別銀行股價波幅都係由消息情緒帶動，但銀行業同經濟大環境相關，始終相對穩陣。
林月萍：長遠恐不及新經濟股
香港廣東青年總會副主席兼秘書長林月萍（Moray），佢就話十幾年前已經覺得滙控並非投資首選，當時滙控銳意走遍環球市場，但適逢國際金融環境轉差，爆發歐債危機等，都令到滙控泥足深陷。Moray指滙控過去因高息同穩定，曾經係退休人士嘅心儀股票，唔少老人家會重金購入，然而早前滙控宣布唔派息，此舉未免太令人失望。雖然滙控股價跌到好殘，但Moray認為撇開政治因素，屬於舊經濟嘅滙控，長遠嘅發展恐怕未必及得上同新經濟相關嘅企業股票咁話。
卓妮