中環出更：IT界選舉開支差逾8000倍 朱嘉盈耗51萬 馮振華花60蚊
早前報名九月立法會換屆選舉嘅參選人申報嘅選舉開支陸續出爐，當中資訊科技界數名參選人嘅選舉開支真係差天共地，有人使咗五十多萬元；有人用得六十蚊，金額相差幾千倍喎，究竟搞邊科呢？
參選資訊科技界嘅DayDayCook（日日煮）創辦人朱嘉盈使咗逾五十一萬元，其中選舉工程費用，包括搵公司拍宣傳短片、剪片、做平面形象設計就已經使咗二十七萬四千港元；而佢花費喺選舉網站嘅費用都唔少，用咗十三萬元。可能佢都「貪靚」，喺化妝同形象設計方面都「落重本」，用咗三萬元，仲用咗約二千五百元添置新衫。
同樣參選資訊科技界嘅數據工程師馮振華就「慳家」好多喇，淨係用咗六十蚊去影咗八張相就搞掂，同朱嘉盈嘅選舉開支相差八千幾倍！莫非馮真係咁有信心，諗住靠六十蚊脫穎而出？
仲有一位參選資訊科技界嘅李啟明就使咗約四萬四千元，喺選舉網站、電郵等IT服務方面使咗約三萬元，剩低嘅開支金額主要係執執自己個Look，同埋搵核數師睇番盤數。
石禮謙一半使費用喺人工
睇番啲諗住連任嘅現任議員，地產及建造界嘅石禮謙就用咗約四萬九千元，差唔多一半用喺代理人同拉票人嘅工資；另一半就用嚟租借辦公室、印傳單等雜項，同時申報交通費逾六百蚊。而喺批發及零售界競逐連任嘅邵家輝就使咗約十萬七千元，其中搵公關攞意見就用咗六萬蚊，其餘嘅金額主要用喺拍攝短片、社交媒體等。
另外，參選金融服務界嘅徐聯安都有搵公關顧問喎，但金額就冇邵家輝咁多，公關費用使咗四萬一千港元。而報名參選九龍西嘅劉澤鋒，可能比較環保，申報咗二百蚊嘅二手「小露寶」同一百蚊嘅二手無線咪。
卓妮