食環署早前委託私人檢測公司，為食肆員工等高危群組提供新冠肺炎檢測，計劃雖然喺上個月尾結束，然而日前就爆出篤數疑雲。話說有餐廳並冇登記參與計劃，竟收到員工完成檢測嘅證明，而完成檢測嘅員工數目，更超出實際人數逾倍！雖然食環署出嚟解畫，話係檢測公司擺烏龍。不過亦有唔少未有參與計劃嘅餐廳，遭人擅自向員工派發樣本瓶，直至收到檢測公司發出嘅證明先至知道「被參與」計劃，咁又點解釋呢？食環署署長劉利群需向市民交代清楚，到底出咗乜嘢問題，唔好側側膊呀！
