政情：跨境童乏支援 教局被斥拋波畀學校
教育局宣布本港學校將分兩階段恢復面授課堂，但以半日制形式進行。教育局局長楊潤雄尋日話，相信部分學校會採取上午面授、下午網上授課嘅教學模式，但跨境學童就可能冇得參與面授課程喇。有議員擔心跨境學童會跟唔上學習進度，又批評教育局「拋波」畀學校，認為局方要向學校提供支援，同埋承擔最大責任。
楊潤雄指每日往返難協調
楊潤雄指中港兩地嘅關口設施、校巴安排都出現困難，如果跨境學童每日往返兩地，局方好難協調。佢又話，必須等待港版健康碼實施，先至可以全面照顧跨境學生嘅需要，然而當下疫情反覆，故未能提供確實安排。佢促請校方用實時直播、錄影或補課嘅模式，照顧未能回港嘅跨境學童。
議員周浩鼎（Holden）就話，唔少跨境學童嘅家長都好擔心仔女冇得出席面授課程，以致追唔上學習進度，但教育局嘅表現就好似束手無策咁。佢批評楊潤雄嘅講法係「拋個波」畀學校，局方冇諗過教師如何兼顧到咁多嘢之餘，仲要冇提供支援。Holden又批評局方連視像教學嘅支援都未做好，話唔少清貧家庭因欠缺相關設備而向關愛基金申請，但礙於手續繁複，一時三刻根本攞唔到，實質上又會再度拖慢學童嘅學習進度囉！