第六屆立法會將延任不少於一年，但民主派議員舉棋不定，要等埋民調結果才決定係咪接受延任。繼早前先後兩次民調分別有逾六成及近五成市民反對民主派延任後，尋日又有研究所公布相關調查結果，顯示有逾七成六嘅受訪者認為泛民主派議員應該全部辭任，但相信泛民又當睇唔到喇。
公民社會研究所喺本月六日至十日期間，訪問咗逾二千五百名十八歲以上嘅選民。結果顯示，有約百分之七十六點二嘅受訪者認為泛民議員最好全部辭任，而最應該辭任的政團，依次序為民主黨（百分之七十七）、人民力量（百分之六十八點九）、香港本土（百分之六十三點一六）、公民黨（百分之六十二點九四）、教協（百分之六十一點五）及熱血公民（百分之四十九點三六）。
其實香港民意研究所之前做嘅兩次調查，分別只有兩成同三成半受訪者支持民主派議員延任。而胡志偉當時話民調結果係參考性資料，然後十幾位民主派議員又要整多個民意調查，話畀市民多啲時間消化喎。如今又再多一項調查叫班泛民辭職，睇嚟要等到香港民研為佢哋度身訂造嘅民調結果出爐後，佢哋先至會承認結果。