政情：拒寄區議員工作報告 郵政雙重標準遭投訴

關係欠佳加上抗疫政策離地，政府自然成為區議員嘅鞭策對象，唔少區議員嘅工作報告都係批評政府施政。有份去投訴嘅民主黨觀塘區議員梁翊婷，份工作報告除咗批評政府，仲提到「香港人需要進入長期抗爭」、「BNO平權之路終成真」等字眼。梁仲話，成份報告一早已經設計好，喺八月初已經申請以「郵政通函」方式寄出，點知八月中就收到通知話有關申請被拒。

涉及示威口號 疑觸及紅線

同樣申請被拒嘅觀塘區議員鄭景陽形容，自己份工作報告內容好溫和，但當中有提到「康復香港 時代抗疫」嘅字句，懷疑同近年嘅示威口號近似而遭拒絕申請。佢仲話為咗試探郵政條紅線，曾經多次修改報告內容嘅字眼，仲試過每次只提供兩頁內容畀郵政審批，其中一頁內容都只係提到「政府防疫資訊嚴重不足」，結果全部被彈返轉頭，直斥郵政好離譜。佢話以前香港郵政只係睇郵件格式，質疑喺《港區國安法》實施後，只係批評政府都已經觸及紅線，不滿郵政以行政手段逼人噤聲。

泛民轟政治審查 揚言挑機

曾三度去信朱曼鈴嘅荃灣區議員易承聰，指郵政方面嘅回覆只係再次引述條例，同埋表明「香港郵政的決定為最終決定」，唔會就有關決定提供任何解釋。佢仲提到話其黨友、身兼中西區區議員嘅立法會議員許智峯喺七月初就成功寄到工作報告，認為許作為立法會議員，份工作報告仲政治性，但反而許就寄到，而佢哋就申請失敗。佢亦不滿建制派同樣喺宣傳單張大講政治嘢，都可以成功申請服務，認為郵政做法係政治審查。

郵政回應查詢時，除咗話過去一年拒絕咗超過一千三百份通函申請，仲重複番投寄條款及須知嘅內容。一班區議員揚言如果郵政繼續都係咁，會考慮不停提交唔同嘅稿件設計，甚至只寫「開天窗」三隻字，睇吓郵政仲批唔批喎。喺郵政一直迴避嘅同時，民主派就繼續玩嘢，作為署長嘅朱曼鈴睇怕有排煩喇！

不過，香港郵政又係抵鬧，如果因為區議員工作報告內容敏感或涉嫌違反《港區國安法》，就應該義正辭嚴講清楚，樣樣嘢解釋得含含糊糊，成隻鵪鶉咁，結果咪畀人質疑囉，政府管治長期弱勢就係咁嘅原因。