中環出更：疫下出分力 蔡宗富撈過界生產口罩
本港疫情稍為緩和，但相信大家回想年初疫情爆發初期搶購口罩嘅苦況，仍然記憶猶新。而香港鐘表業總會（總會）副主席蔡宗富（Daniel）都決定跨界發展，開廠生產口罩，話希望為社會出一分力。
年初嗰陣，Daniel一家去菲律賓旅遊度假，但知道香港爆發疫情就即刻調整行程，抽咗一兩日時間走遍當地嘅唐人街掃口罩，返到香港就轉贈畀身邊嘅親友。然而Daniel發覺，市面嘅口罩荒相當嚴重，於是佢就決定開設口罩廠。驟耳聽來，鐘錶製造同生產口罩似乎毫無關係，但原來Daniel有設置無塵車間生產手錶嘅經驗，令開設口罩廠嘅工作更加得心應手。
李永安轉型搞網購
從事鐘錶業三十幾年嘅總會主席李永安（Samuel）就認為自己好難再轉行，但面對疫情影響亦決定將生意轉型，提供網上銷售渠道。Samuel話自己都有網上購物中伏嘅經驗，特別喺買平價貨品時唔會考慮太多，到手後就發現貨不對辦喇！所以佢都會多啲企喺客人嘅角度思考，而且售賣貴價鐘錶會有免費退貨期，唔做好品質保證只係搵自己笨。
總會副主席林文華（Kan）嘅生意亦受疫情打擊，佢選擇迎合年輕人口味，推出智能手錶等產品。唔單止老本行，Kan亦投資餐飲生意，可以分散風險，雖然餐飲生意同樣受疫情重創，但佢話飲食始終係生活必需，未至於對生意太悲觀，而且佢覺得飲食業比較唔需要太多專業知識，係投資另一門生意嘅好選擇。
卓妮