中環出更：稱有人扮專家防疫 張宇人遭鬧爆
疫情爆發以來，政府推行過好多種抗疫措施，成效係點就見仁見智喇。身兼行政會議成員、飲食界議員張宇人日前喺電台節目上，批評政府唔懂得張弛有道，又指冇醫生識得計風險，斥「大家唔好扮專家」。天文台前台長林超英隨後鬧爆，話張嘅言詞囂張無禮，貴為行政會議成員應支持政府，但公開拆政府台，實在有失身份，仲去信政府要求將張撤職。
林超英喺信中提到，張宇人喺多個場合批評政府施政同埋侮辱官員，形容係口出狂言，破壞行會形象，批評張只顧自身業界利益，言行同行會成員身份唔匹配，而且違反行會成員應有之義，要求政府立即把他撤職，同埋要求張向官員道歉。張宇人透過辦公室回應話，喺節目中冇點名批評任何人，所以林超英嘅說法並唔存在喎。
「禁酒令」時曾公然唱反調
其實張宇人都唔係第一次公開同政府唱對台戲，事關政府喺今年三月因應疫情而打算推出「禁酒令」時，就有最少三名行會成員公然唱反調，張亦係其中之一，當時佢仲話飲酒唔會令疫情散播，如果政府要推行就要百分百補貼受影響嘅店舖。
事實上，政府推行食肆防疫措施朝令夕改，進退失據，不止飲食界批評，就算市民都冇啖好食。外界一直批評行會非官守成員只係橡皮圖章，但若要個圖章蓋得準確，政府施政或措施都要推行得合理，能夠服眾，否則施政只會舉步維艱，行會閂埋門都家嘈屋閉。
卓妮