中環出更：染新冠終康復 林建康全家遊英莊園
已故麗新集團主席林百欣嘅養子林建康(Matthew)同太太黃寧艷(Lianne)，曾經有傳今年三月喺英國探望囝囝期間染上新冠肺炎，更出現肺部萎縮嘅嚴重情況。之不過有讀者尋日爆料，指Lianne尋日凌晨喺社交媒體上載咗張成家人喺英國探朋友嘅相，貼文下面都有好多朋友留言話好開心見到佢哋個個健健康康啊。至於Lianne回覆卓妮查詢時都話，佢同Matthew依家非常健康！
根據讀者爆料指，Lianne一家人最近去咗探佢嘅一個英國朋友，仲參觀咗對方一個佔地達八十五英畝、於十九世紀初落成嘅豪華莊園。Lianne仲話，莊園內嘅樹都有成二百幾年咁耐，大讚個莊園好壯麗咁話。
仲要揸拐杖輔助
佢仲隨貼附上多張喺莊園內影嘅相，其中一張更係佢哋嘅家人合照，雖然見到Matthew行動仲要揸拐杖輔助，但相入面個個望落去都好精神。
至於貼文下面都有唔少名人朋友留言，好似已故荔園老闆邱德根嘅兒子邱達根、香港小母牛籌款委員會成員鄧慶治，以及九龍總商會商業部主任伍燕梅等，佢哋都話見到Lianne佢哋個個都又精神又健康覺得好開心啊。
其實卓妮早前據知Lianne四月時已出院，同囝囝繼續隔離抗疫，而Matthew就有喺家庭群組報平安，話當時情況尚可。見佢哋依家咁精神，相信身體都已經康復晒，而Lianne亦透過短訊向卓妮表示，「謝謝問候。我和先生現在非常健康，一切安好！」
卓妮