政情：唔想幫議員宣傳 煤氣停贊助月餅
每逢特定節日，香港中華煤氣有限公司（煤氣公司）都會透過議員、區議員同非牟利機構向有需要人士派食物。今年中秋節就快到，本身諗住煤氣公司會透過議員送出月餅，但點知煤氣話淨係透過非政府組織轄下嘅長者中心，送贈月餅畀長者喎。點解呢？
其實煤氣公司今年曾經贊助區議員派糉畀街坊，但有民主派區議員意圖「博懵」，喺社交平台上載印有煤氣公司標誌嘅糉，但旁邊放置反修例單張，其後該名區議員被煤氣公司停止贊助愛心糉。
選舉延後 仍未及重新安排
但有人近日質疑煤氣公司取消贊助區議員派月餅，唔通又同政治宣傳有關？但煤氣公司回覆本報查詢時話，今年十月一日係中秋節，同原定九月六日嘅立法會選舉相當接近，所以同歷屆選舉時嘅安排一樣，煤氣公司唔會贊助議員送出月餅，以免有涉及選舉宣傳之嫌。
煤氣公司又話雖然立法會選舉延後一年，但礙於冇足夠時間訂購同製作月餅，因此未能向議員提供月餅贊助。咁係咪即係話政府太遲宣布延後選舉，先搞到市民冇月餅攞呢？