政情：公民講場：疫未受控推旅遊氣泡 邱騰華哪來的自信

近日疫情終於有回穩迹象，商務及經濟發展局局長邱騰華就話疫情若進一步受控，就會放寬社交限制，又提到政府先後同多個國家接觸，探討以「旅遊氣泡」恢復互相出行咁話。港人好鍾意旅行，有得出門就梗係好喇，不過實施旅遊氣泡嘅先決條件，係要雙方嘅防控措施、同疫情發展都相若。問題係香港嘅第三波疫情都未完結，嚟緊入秋又有機會爆發第四波，邱騰華何來咁大信心，人家會信得過香港嘅疫情發展？況且講咗好耐嘅健康碼往來澳門同內地，到依家都只聞樓梯響，唔該政府認真做實事，唔好下巴輕輕好喎。