政情：林琳遇電騙 直播教街坊破解
電視廣告都教落「騙徒手法層出不窮」，騙徒會扮成有公權力嘅人去呃錢，真係防不勝防啊！青年發展委員會委員林琳日前遇上電話騙案，對方仲自稱係入境處打嚟，林琳就索性直播電話騙案，順便希望市民唔好中招啦！
騙徒嚇到收線
林琳指尋日突然有個印尼電話打畀佢辦事處手機，對方聲稱係入境處打嚟，話佢有一份文件出現問題，要求佢按二字接駁廣東話服務，點知接通後竟然係一個講普通話嘅女人接聽。該名疑似女騙徒就問林琳姓名，林就講咗個假名，之後個疑似女騙徒就話林有份文件有問題，林隨即就反問「點解你哋要呃人呢？」 對方聞言就即刻收咗線！
林琳事後話，最近好多街坊都中招電話騙案，所以把握機會即刻直播畀大家聽。林話入境處同公安部門係冇可能咁樣打畀市民嘅同時，唔知對方叫咩名，又話就算係銀行打嚟都未必係真。佢教市民如果有銀行打嚟嘅電話，可以先收線再打返去銀行查詢。林琳仲話，佢會將呢次嘅電話騙案轉告警方，希望大家都可以保護自己咁話！