政情：鄭若驊史上最廢 民望一沉到底

檢控決定一塌糊塗

鄭若驊民望「插水」並非無因，佢由上任至今一直醜聞纏身，作為香港司法體制中肩負重任嘅律政司司長，卻經常被外界批評失職。即使社會對政策、條文同法律觀點出現爭議，佢永遠都只會匿埋做「鍵盤戰士」，求其寫吓網誌就當完成職責；而佢作為律政司首長，所做嘅檢控決定更加係一塌糊塗！早前引起公憤嘅深井虐殺動物案，竟然不予起訴涉案人士，輿論嘩然，無論建制抑或泛民都同聲譴責。表現咁令人失望，民望長期包尾實在正常不過，難怪鄭若驊嘅支持率較之前再跌兩個百分點，至百分之十三，民望淨值再跌三個百分點，錄得負百分之五十六。

餘下兩位司長嘅評分都唔好得去邊，政務司司長張建宗嘅評分輕微下跌零點五分，只有二十八點五分，民望淨值為負百分之三十九；而財政司司長陳茂波評分就下跌一點五分，至三十五點五分，民望淨值係負百分之十八。

至於一班局長嘅表現都差強人意，民調結果顯示，佢哋全部嘅民望淨值都錄得負值。對比兩個月前嘅調查，教育局局長楊潤雄嘅支持率係百分之十七，屬包尾大幡。其餘十二名局長嘅民望淨值分別下跌八至十七個百分點。其中，發展局局長黃偉綸同勞福局局長羅致光嘅民望淨值，更加創下二○一七年上任以嚟新低，分別係負百分之十七同負百分之二十。

林鄭反對率達69%

今次嘅民調係於八月三十一日至九月四日，成功訪問咗超過一千名十八歲或以上嘅香港市民。結果顯示，特首林鄭月娥嘅評分錄得二十八點一分，反對率為百分之六十九，支持率只得百分之二十一，民望淨值再跌三個百分點至負百分之四十八。