中環出更：不滿羅冠聰言論遭引用 黃之鋒痛斥民主黨
第六屆立法會延任不少於一年，民主派議員應否接受延任所惹來嘅爭拗繼續發酵，最近更出現「鬼打鬼」！前香港眾志秘書長黃之鋒尋日喺社交平台貼文痛斥，指民主黨未曾事先徵得前眾志主席羅冠聰嘅同意，就擅自引用羅嘅相片同言論以配合佢哋嘅文宣，感到非常失望。
令公眾誤以為羅撐議員延任
黃之鋒話發現民主黨印製幾十萬份入屋單張，向市民解釋佢哋四年任期屆滿後繼續留喺委任議會嘅理由。黃認為政黨向市民表述自己對政局嘅觀點本來無可厚非，問題在於呢份文宣展示羅冠聰嘅相片，以及羅早前喺網絡公開發表對於國際形勢嘅分析，明顯誤導公眾羅冠聰支持議員留任。黃又話曾向民主黨中人查詢，而對方亦坦承事前確實冇知會羅冠聰，雖然答應往後唔再刋出有關內容，不過幾十萬份印有羅冠聰相片嘅民主黨單張已被送到全港公屋信箱，「Damage is done」（已造成傷害）。
黃鬧爆堂堂一個民主黨，竟將立場強加於一名流亡海外嘅手足，又話相信身處歐洲嘅羅冠聰，都係起床以後先至知道自己被出現喺「支持留守議會」嘅政黨單張當中。
對於黃之鋒嘅抨擊，民主黨中委林卓廷隨即解畫，指單張只係如實引述羅冠聰公開發表文章內容，目的係讓公眾知悉各方觀點，並不涉及羅是否支持延任。其後羅冠聰就反駁話，單張嘅處理手法令佢難堪，又重申自己並非支持全面留守議會，亦希望同道友好，下次若有類似嘅援引時能夠提早講聲。
卓妮