政情：朱凱廸再籲民主派杯葛延任
立法會選舉延後一年舉行，泛民主派議員打算喺九月廿一日進行決定延任與否嘅民意調查。早前曾公開表達意向，支持集體杯葛延任立法會嘅議員朱凱廸尋日喺電台節目中，再次呼籲民主派唔好接受延任。朱指不同嘅民調顯示，大多數民主派支持者都希望杯葛未來一年嘅立法會，認為議員若接受中央任命，將會向國際社會發出錯誤訊息，以為香港人正在放棄，相反若議員抵制議會，則能呼應國際社會，爭取立即恢復選舉。
指港人已陷不歸路
朱凱廸認為中央政府因為擔心民主派喺立法會選舉中取得過半數議席，迫使中央接受港人的政治訴求，為咗自保同爭取時間，於是延後九月選舉，而希望民主派接受為期一年嘅延任亦係軟着陸方法嘅一種。朱指，民主陣營中嘅溫和派人士仍相信中央同香港能逐步民主化，亦認為恢復正常工作可以令香港人稍作休息。
惟朱形容港人已經到咗不歸路嘅地步，中央同香港之間相對和諧嘅時光已經蕩然無存，指港人未來要從戰鬥、被打敗，以及不戰而敗作選擇，因此朱呼籲民主派抵制議會，並與港人一起爭取反映港人意願嘅選舉。